Liebi Chinde,
im Summer wohn ich mit mim Schmutzli und em Eseli im tüüfe Tannewald. I dere Zit tüend mir die verschiedenschte Sache für d’Chlausezit vorbereite. So müend d’Seckli, won ich Öi verteile, gnäht werde. Au d’Äscht für d’Fitze tuen ich schniede. Jedes Jahr überleg ich mir nöii Gschichtä, won ich Öi chan verzelle. Jetzt wo d’Chläuseziit chunnt, ziehn ich mit mim Fründ, em Schmutzli an Waldrand i öises Hüüsli.
Ich würd mich fröie, wann nöd nur ich Öi, sondern au Ihr mich go bsueche chömed.
Am Samschtig, em 4. Dezember 2021, dörfed alli wo Luscht händ, zwüschet 14.00 und 16.30 Uhr go luege, wo ich ässe und schlafe tuen.
Jetzt fröged Ihr Öi sicher, wo miis Hüüsli isch. Zum Hüüsli chan mer mit emene Büsli fahre. Es haltet bi de alte Landi, det wo hüüt 1A Mietwagen AG isch.
Wänn Du mit Diine Eltere zu mir laufe willsch, so chasch Du dä Büslifahrer frage. Er seid Dir, wo s’Hüüsli isch. Oder Du laufsch eifach a dä Embracherstrass bis zum Waldrand und gasch dänn links uf em Wäg am Waldrand naa bis zum Hüüsli. Dänn gsesch mich sicher.
Ich fröie mich uf Diin Bsuech.
Bis bald
Öie Samichlaus
Schutzkonzept Chalushüsli Winkel 2021
Es braucht kein 3G Zertifikat – Keine Masken – Keine Anmeldung